Айгине МИБ «Манас» айтуучулар менен жолугушуулардын жаңы катарын баштады: Айгине МИБ эпостун «Чоң Казат» аттуу кайгылуу бөлүмүнүн негизинде согуш жана тынчтык маселелерин талкуулоого арналган манасчылар менен жолугушуулардын жаңы катарын баштады. Бул демилге эпосту тереңирээк түшүнүүгө жана анын бүгүнкү коомго берген сабактарын кайра баалоого багытталган. Алгачкы жолугушуу Жетинин айынын 26-да чоң манасчы Дөөлөт Сыдыков менен өткөрүлдү. Манасчы «Чоң Казаттагы» негизги окуялар, адамдык тандоо, жамааттын жоопкерчилиги жана тынчтыкты сактоого байланышкан наркый сабактар тууралуу өз ойлорун бөлүштү.

Чолпон Турумбаева «Коңур үн» демилгесин Бакуда тааныштырып келди: Жетинин айынын 20–21инде Баку шаарында өткөн түрк дүйнөсүнүн салттуу музыкасына арналган эл аралык иш-чарада КГУКИнин профессору жана «Коңур үн» демилгесинин жетекчиси Чолпон Турумбаева өз демилгесин тааныштырып, «Кыргыз элдик аспаптык музыкасындагы коңур үндүүлүк» аттуу баяндамасын жасады. Баяндама демилгенин кыргыз аспаптарынын коңур үндөрүн изилдөө жана калыбына келтирүү боюнча жүргүзгөн ишине негизделди. Иш-чара Чолпон эжеге демилгенин ыкмаларын эл аралык деңгээлде таанытууга жана жаңы адистер менен байланыштарды бекемдөөгө мүмкүнчүлүк берди. Чолпон Турумбаева Азербайжан Улуттук Илимдер академиясынын Ыраазычылык Каты менен сыйланды.

«Жети Эненин Батасы» долбоорунун топу Бештин айынын 1-күнү Политехте өтө турган иш-чарага акыркы даярдыктарды көрүүдө. Бул жолугушуу «Зомбулукка каршы 16 күн» кампаниясынын алкагында уюштурулуп, анда студенттер, ошондой эле чакырылган маданият өкүлдөрү жана психологдор катышат. Алар менен аялдарга жана кыздарга карата зомбулук маселеси жана аны жеңүүнүн жолдору боюнча ачык талкуу жүргүзүлөт. Иш-чарага карата топ аялдардын баталарына арналган жандуу сүрөт тасманы даярдап бүттү. Тасманын көркөм негизи — кол өнөрчү Гулмира Кутуева жараткан оймолор. Ар бир оймодо өлкөнүн ар кыл аймактарынан чогултулган аялдардын баталарынын ыйык сөздөрү жашырылган. Кыял Тажиеванын түзөтүү иши аркылуу баталар көркөм түргө ээ болуп, өзүнүн жандуу үнүн жана терең маанисин сактап калды. Ошол эле учурда долбоордун топу зордук-зомбулуктун курмандыгы болгон жети аялга жана кызга арналган жети кошокту жаратты.

Иш-чарага катышуу: Айгине МИБ жетекчиси Гүлнара Айтпаева «Карама-каршылыктан – маданияттар ортосундагы баарлашууга: коопсуздук жана туруктуу өнүгүү багыттары» аттуу жыйналышка катышты. Иш-чараны Улуттук илимдер академиясы, «Маданияттар жана өркүндөөлөр баарлашуусу» коомдук уюму жана IPCHAIN уюму уюштурган. Уюштуруучулар жыйындын максатын төмөнкүдөй түшүндүрүштү: «Каршылыкты баарлашууга өткөрүү — улуттук коопсуздукту чыңдоого жана мамлекеттин туруктуу өнүгүүсүнө шарт түзөрүн көрсөтүү». Гүлнара Айтпаева «Рух сакталган жер: Борбор Азиянын маданий мейкини» аттуу баяндама жасады. Бурдьенүн түшүндүрмөсүндө маданий мейкиндик — өз эрежеси жана баалуулуктары бар көзкарандысыз коомдук аянт. Бул алкактын ичинде рух — ата-бабалардын эси жана алардын мурасын сактап калууга болгон эрк катары белгиленди. Айде Алымовага сүрөт үчүн рахмат.