Маданий мурастар жана заманбап технологиялардын жолугушуусу: Айгине маданий изилдөө борборунун тобу “Солтек” уюму менен биргеликте “Маданий мурас менен заманбап технологиялардын жолугушуусу” аттуу долбоордун экинчи баскычын ишке ашырууга киришти. Бул баскыч эки негизги багытты камтыйт: ыйык жерлерге зыярат кылуу салтынын мааниси жөнүндө кыска анимациялык тасма жаратуу жана балдар үчүн кыргыз жана орус тилдеринде көк-бөрү боюнча соңгу мобилдик видеооюн иштеп чыгуу. Видеооюн Кыргызстанда жасалган алгачкы экшн жанрындагы мобилдик оюн болуп, App Store жана Google Play платформаларында жеткиликтүү болот. Долбоордун тобу мобилдик оюнду долбоорлоо жана анын мазмунун түзүү ишине киришти. Оюндун дизайнын жана мазмунун түзүү “Xer0” аттуу жаш сүрөтчүлөр жана санариптик өндүрүмдөрдү иштеп чыгуучулар тобу менен кызматташтыкта жүргүзүлүүдө.
Мурдаштагы чийимташтарды сактоо: Айгине маданий изилдөө борборунун тобу Ош облусундагы Мурдаш Башы тарыхый-маданий комплексинин санариптик картасын түзүү ишин ийгиликтүү аяктады. Бул долбоордун алкагында археологиялык жазуулардын жана таштардагы сүрөттөрдүн салттуу сүрөттөмөлөрүн санариптик картага киргизилиши толугу менен аяктады. Мурдаш Башы комплекси тууралуу жаңыланган маалымат, анын ичинде санариптик карта, petroglyphs.kg сайтында жеткиликтүү. Бул карта колдонуучуларга Мурдаш Башы комплекси менен жана анын сүрөттөрү менен таанышууга мүмкүндүк берет. Долбоордун акыркы кадамында быйылкы жылдын июнь айында жүргүзүлгөн талаа изилдөөлөрүнүн негизинде картаны жаңылоо жана археологиялык маалыматтар менен толуктоо иштери аткарылды. Талаа иштерине катышкан археолог Салтанат Алишер кызы тарабынан жазылган археологиялык эскертүү да даярдалды.
Кол өнөрчүлүккө арналган маалыматтар булагы: Айгине маданий изилдөө борборунун тобу Кыргызстандагы кол өнөрчүлүккө арналган маалыматтар булагын түзүү боюнча долбоорду жүргүзүүгө киришти. Бул долбоор ЮНЕСКОнун колдоосу алдында иш алып барган Азия-Тынч океан аймагындагы бейзаттык маданий мурас боюнча эл аралык маалымат жана тармак борбору (ИЧКАП) тарабынан колдоого алынган төрт жылдык программасынын алкагында ишке ашууда. Программанын максаты – салттуу кол өнөрчүлүктү өнүктүрүү жана Кыргыз Республикасындагы туристтик индустрияны бекемдөө. Айгине тобунун негизги милдети – өлкө боюнча кол өнөрчүлүк салтына байланышкан бардык жеткиликтүү материалдарды чогултуу жана тутумдаштыруу. Бул иштин натыйжасында жергиликтүү кол өнөрчүлүк тармагынын байлыгы менен ар түрдүүлүгүн чагылдырган пайдалуу булак түзүлөт. Маалыматтар булагы салттуу билимдерди сактоо жана өткөрүп берүү үчүн гана эмес, ошондой эле өлкөнүн маданий туризминин негизги элементи катары кол өнөрчүлүктү жайылтуу үчүн да маанилүү курал болушу керек.
